سياسة الخصوصية

خصوصيتك مهمة لينا. الصفحة دي بتشرح ببساطة إيه البيانات اللي بنجمعها، وبنستخدمها في إيه، ومين بيشوفها. وده متوافق مع قانون حماية البيانات الشخصية المصري رقم ١٥١ لسنة ٢٠٢٠.

البيانات اللي بنجمعها

• بيانات الحساب: اسمك وإيميلك. ولو دخلتي بـ Google، بناخد الاسم والإيميل والصورة من حسابك هناك. الباسورد بيتخزن متشفّر، ومحدش يقدر يقراه، ولا حتى إحنا.
• قايمتك: الحاجات والأقسام والأسعار والملاحظات، وتاريخ الفرح، ونصيب كل طرف.
• الملفات: صور الحاجات والفواتير اللي بترفعيها.
• المجتمع: البوستات والكومنتات والصور اللي بتنشريها.
• بيانات تقنية: عنوان الـ IP ونوع المتصفح لكل جلسة دخول، عشان نأمّن حسابك.

بنستخدمها في إيه

• عشان نشغّل الموقع ونحفظ قايمتك ونعرضهالك.
• عشان نبعتلك إيميلات ضرورية، زي تأكيد الإيميل وتغيير الباسورد، وتذكير بالأقساط ومواسم العروض. وإيميلات التذكير تقدري تقفليها من الإعدادات.
• عشان نحمي الحساب ونمنع الإساءة في المجتمع.

مش بنبيع بياناتك لحد، ومش بنستخدمها في إعلانات.

مين يقدر يشوف بياناتك

• قايمتك محدش يشوفها غيرك، إلا اللي انتي بعتيلهم لينك مشاركة. وتقدري تلغي المشاركة في أي وقت.
• فريق جهازي: ممكن يطّلع على قايمتك للقراية بس، لو محتاجين نحل مشكلة عندك أو نوقف إساءة. وكل مرة بتتفتح فيها قايمتك من فريقنا بتتسجل باسم اللي فتحها ووقتها.
• النشر من غير اسمك: لما تختاري تنشري كمجهولة، اسمك وحسابك مبيتبعتوش مع البوست خالص، ولا حتى للبنات التانيين في المجتمع.
• صور المجتمع: بنشيل منها أي بيانات مخفية (زي المكان ونوع الموبايل) قبل ما تتنشر.

الشركات اللي بنتعامل معاها

• Neon: بتستضيف الداتابيز والملفات، على سيرفرات في الولايات المتحدة.
• Vercel: بتستضيف الموقع نفسه.
• Resend: بتبعت الإيميلات، وبيوصلها إيميلك واسمك بس.
• Google: لو اخترتي تدخلي بحساب Google.

لما تستخدمي جهازي، انتي موافقة إن بياناتك تتخزن برا مصر عند الشركات دي.

حقوقك

• تشوفي بياناتك وتعدّليها في أي وقت من جوه الموقع.
• تنزّلي نسخة من كل بياناتك من «الإعدادات ← تحميل نسخة من بياناتك».
• تمسحي حسابك نهائي من «الإعدادات ← مسح الحساب نهائي». ده بيمسح حسابك وقايمتك وكل صورك وفواتيرك وبوستاتك وكومنتاتك على طول.

الكوكيز والتخزين على جهازك

بنستخدم كوكي واحدة للدخول بس، ومفيش كوكيز إعلانات ولا تتبع. وبنحفظ على جهازك اختيارك للثيم، وآخر نسخة من قايمتك عشان تفتح وانتي من غير نت. النسخة دي بتتمسح لما تعملي تسجيل خروج.